Fins al 26 de setembre, foguèt dobèrt un concors promogut per l’entrepresa Repsol per elegir, mejançant votacion populara, “lo melhor endrech d’Espanha”. Après qualques fasas, dos endreches son arribats a la finala: l’espaci natural de la Lòna de la Gitana, en Castelha, e la Glèisa de la Magdalena d’Olivença. Aquela glèisa del sègle XVI ganhèt la votacion. Espanha annexèt aquela municipalitat en 1801, una annexion que Portugal reconeis pas. Portugueses e espanhòls an aprofechat lo concors per ne revendicar la sobeiranetat.
 
Son sustot d’internautas portugueses que se son mobilizats fins ara a travèrs de fòrça forums e grops de Facebook, ont demandan de “votar per aquela catedrala bastida pels portugueses e balhar de visibilitat a Olivença”. L’associacion Além Guadiana apelava tanben a votar, per motius de promocion culturala e patrimoniala. Aquela associacion es centrada en l’estudi, recuperacion e difusion de la cultura portuguesa a Olivença.
 
Per contra, lo Grop dels Amics d’Olivença, que dempuèi 1938 revendica la reïntegracion d’Olivença en Portugal, considèra que la candidatura de la Glèisa de la Magdalena al concors de Repsol es una provocacion: “L’eleccion serà pas innocenta e aurà de menar totes los portugueses a se demandar quines son los motius reals dels organizaires de l’eveniment”.